開blog理念及目的

年輕嘅時候其實都有寫blog嘅習慣，將生活一點一滴，搞笑趣事逐一記錄，當時主要分享對象係朋友。後來，因緣際會，冇啦啦走入醫護行業，全職再考牌學習，冇時間再打理blog，而且當時寫文章往往毫不避嫌將生活私事鎖事趣事皆公開，原意只係想跟好友分享，但網路之大，無遠弗屆，有d你唔想佢睇嘅人都會接觸到你嘅blog，就藉口要全心全意再投入學業之路而將個blog關閉。

一直想開返一個blog喺網絡世界以文會友，但自己又實在唔知仲有冇恆心去寫。

近一兩年一直學習財自，雖未成功，但喺網絡上見到好多香港同台灣嘅blogger都好願意分享，令我受益匪淺，喺身邊人嘅鼓勵下終於再踏出呢一步。

呢個blog唔係淨係講財自嘢，分享亦會包括生活所見，醫護趣事，政事天下事(喺依家咁嘅時勢連喺fb講下政見都唔敢，希望開blog可以暢所欲言)，就算冇觀眾都當作一個紀錄，俾我同我最愛嘅你將來有一個回憶(可能你就係我唯一觀眾)。

呢個blog除左我同你，唔會特別話俾親戚朋友聽係我開，望可以真係遇到有緣人睇到，或者結識到同路中人。