反思篇 之 閱讀Less is More

過往兩、三年，我為左逼自己盡快pick up喺投資路上嘅進展，不斷「增值」自己，增值嘅方法不外乎去幾樣：一開始上堂搵老師學習，慢慢開始自己睇好多唔同類型嘅書研究，join唔同嘅group交流，不論facebook, wechat, what's app, telegram，睇唔同嘅blogger嘅文章或者係youtuber嘅片。

基本上，我諗香港出名嘅blogger, youtuber, kol, 教course嘅阿sir，甚至係台灣嘅，你講得出我都聽過或睇過。慢慢我發現，我花喺睇blog睇片嘅時間甚多，而且d group嘅message開始多到我完全都跟唔切。

吾生也有涯，而知也無涯。以有涯隨無涯，殆已。

尤其依家資訊發達到如斯地步嘅年代，我地完全唔係擔心得唔到資訊，反而係擔心資訊太多或者資訊是否正確。

之前睇左兩篇文章：《跳出讀書的"低水平勤奮"陷阱》& 《我們是否陷入了大量閱讀，思考不足的迴圈之中？》之後，我沉澱落黎，諗諗到底我每日睇咁多嘢，有幾多係對我真正有幫助嘅呢？而我一日睇十篇廿篇文章後，又係咪真係吸收到晒而轉化為己用？有時放假一日睇一本書，一個假期後，好proud咁話俾人聽我個假期好充實，睇左成十本書，但最終有幾多本真係深深印喺腦海而令我人生受益呢？

我們大量閱讀。我所遇到的聰明人，沒有一個不是每天大量閱讀的。但這還不夠。你必須嘗試去抓住一些想法並藉此作出有意義的事情。–查理・蒙格(Charlie Munger)

 

我堅持每天應該要花許多的時間坐下來思考。這在美國的商業世界當中是很不尋常的一件事情。我閱讀和思考。當我讀得越多，想得越多，也比較不會貿然地作出決策。我之所以會這樣作，是因為我喜歡這樣子的生活。–華倫・巴菲特(Warren Buffett)

「讀得太多，想得太少」係喜歡閱讀嘅人一個常見嘅陷阱。而我諗返呢兩三年讀嘅投資書有邊d係喺我投資路上一直有用呢？而讀嘅時間我做左d咩令作者教嘅嘢轉化成自己嘅功力呢？答案就係喺讀完一本好書之後自己再做過一份閱讀notes。因為每個人嘅能力、背景、根基都唔同，所以每人睇書嘅得著都唔同，睇完一本好書之後將對自己有得著嘅嘢organize一次再寫返notes，能夠幫你好好整理思緒，到下一次遇到同類型嘅書你可能有d嘢已經知道，於是又將另外一個作者嘅特別功力記落黎，慢慢呢舊海綿就會越吸越多而唔係睇完一次跟住過兩個月就好似完全冇睇過一樣。將不斷吸收嘅知識喺自己大腦度整合同加固先係最重要嘅，多未必就是最好。

所以，近來我做了幾件事：

1) 減少睇網絡文章或群組資訊，增加閱讀書本的時間。因為網絡嘅嘢太多，有d實在唔係幫助緊我地，而係打亂我地嘅思緒，影響我地嘅生活。諗下你有冇無時無刻都睇住個手機，不論瞓覺前，一起身，做緊嘢，甚至冇事冇幹其實你唔打開手機就好似唔知做咩好？到底係你控制手機定手機控制左我地，令我地以為好充實但其實腦袋一直在放空？

2) 有意減慢看書嘅速度，目的就係想慢慢吸收再從而整固喺腦中已有嘅知識。

3) 同完全冇投資根底嘅人分享我以往所學，從而做到教學相長嘅效果。

4) 盡力寫返blog記錄自己投資所學、所想、所犯錯誤。就好似d人點解要寫交易日誌，就係想從而多思考，諗返點樣可以繼續進步。

5) Quit左某部份facebook或what's app投資group，patron，youtube channel等等，有時候人需要築起高牆，讓生命中留下對的人與事；咁唔代表我封閉地只接受自己學嘅一套，我依然維持開放嘅態度接受不同理論，只係過程間只花時間喺當下最重要嘅事上學習。

共勉之！