很久沒打理blog了，正式回歸

工作回歸平淡，呢段時間冇update個blog，但其實一直有留意投資市場情況。半年時間，投資市場發生嘅事太多，淨係個deep V圖都真係估佢唔到，所以炒期指呢d嘢波哥真係無福消受，因為波哥從來都唔估市，好多時候d同事成日問，個市黎緊升定跌，買邊隻好....唔好玩啦，答到你唔洗仲做緊你同事啦！😆

不過又咁講，呢幾個月嘅經歷都真係大開眼界。

三月大跌市，油價暴跌再回彈，黃金依家日日破位.......其實從中學習到乜嘢，有咩deal做得好，有咩deal做錯左或者做得唔夠好，點樣改進投資風格先係最重要。

跌市之前，幾多價值投資信徒等了又等，話等跌市就會衝入去。到真係大跌嘅時候，你係咪有膽量進場嗰位？相信當時有正常倉位嘅人帳面都輸唔少，因為不論股票、債市全部都跌到一仆一碌，波哥當時個倉都蝕緊20-30%，不過因為一心諗住等跌市先執平貨，所以仲有大概70%cash喺手。由嗰時開始打算分三注入，主要入d等左好耐都唔跌嘅板塊，例如係之前提過睇好嘅電子支付、醫療、cyber security、fintech等等。結果入左第一注繼續冧，第二注波哥都怯怯地再調低入場價先敢入，點知都有部份入到，而第三注就唔洗講啦，應該下次世界大戰先會有機會入到了。

事實上呢兩注嘢幫波哥收復大部份失地，就算之前有d股到依家仲坐緊艇，但整體帳面上已經完全收復。

咁我又講下我三個同事嘅故事。

同事A睇左阿乜sir教玩期權，市未跌時唔理好醜但求就手做左勁多Short Put賺期權金，好鬼和味，食到舐舐脷。一到大跌市無奈接左貨，個倉位又控制得唔好，槓杆比例過高，最終跌到個倉剩返50%嘅時候狠心全數清倉，打算等再跌至最低位時撈貨反敗為勝，其後市況回升，保守估計蝕30萬。

同事B未跌市時倉位已近乎全滿，不斷溝d質素不佳嘅股票。到大跌市時想再溝貨但銀彈不足，無奈輕嘆。及後坐艇貨的繼續坐，一字記之曰：等！「未賣出唔算輸」係潛台詞。近來市道回升，同事B好開心，有d貨平手走左，成功甩身！其餘未到家鄉的可以繼續等！

同事C一直對投資充滿熱誠，無論係X sir，Y sir 定Z sir嘅堂佢全數上晒，花費不菲。價值投資、技術分析、股票期權、期指炒賣，佢無一不學。未跌市時佢話覺得有d 高唔入住，大跌市來了，佢話跌得太急要喘定d等個底到，等到Nasdaq都破頂位了，佢話現在個市好虛，唔好入住。

我絕對唔係笑人，只係舉出一d實例去做反思。呢d情況其實係咪都經常發生喺我地身上？價值投資又有咩bug位或者難以執行嘅位？而對我嘅投資路又有咩啟發或改變？下回再講！

工作困境

波哥早陣子面對工作困境，喺未達到財自嘅情況下，只有兩條路選擇：

1）鬼叫你窮呀，頂硬上
2）劈炮唔撈，東家唔打打西家

波哥反覆思量，氣頂上心，同平妹講，不如我裸辭慢慢搵工，反正我地呢行唔會搵唔到工。平妹表面好鎮定，實情嚇一驚，苦口婆心勸導波哥：「你知啦，你唔同我，你咁多要求，又要馬兒好，又要馬兒不吃草，搵工係唔難，不過搵份啱你心水又有返咁嘅人工嘅就唔係咁易架，我驚你到時喺屋企未搵到工又覺得有壓力.... 」（下刪一萬字）

波哥於是畫來畫去，畫左個matrix出黎，睇下到底辭職同唔辭職嘅最好同最壞情況會係點。結果左度右度下，覺得如果打算5-6年後要做到財自同埋移民，咁呢個裸辭可能會影響我地兩口子嘅計劃。為免計劃延誤，唯有暫時頂硬上，然後騎住牛搵下馬。

唔搵由自可，一搵就俾平妹講中左。搵來搵去，都冇乜啱心水，唔係嫌份工唔好，就係嫌人地唔慌出到錢，最終只係send到3封信出街。

3封信出街，有兩份有回音，揀左一份去見。話晒7年冇見過工，都真係有d緊張，見到樣樣衰衰就預左，不過，呢個唔係想講嘅重點。

重點係：通常去interview必選題目是什麼？

例牌1：Please introduce yourself.
例牌2：點解你想轉工/點解你對呢份工有興趣？

聽到呢條題目，其實相信每個人嘅答案都係大同小異，不外乎就係講下呢份工幾有意義同埋會帶俾你幾大滿足感，自己幾想有個新挑戰。面試其實係一個什麼概念呢，就係一個虛偽，係極度虛偽嘅過程，唔通interviewer想聽我講對份工有興趣係因為人工高，福利好，返工時間理想，可以令我儲蓄加快，多d時間研究財務自由，盡快賺回自己嘅人生同時間？佢地只想聽到明知係假都係死都要你答嘅標準答案先會對你加以考慮。所以君不見你老細成日都會話請左一個幾好幾好嘅同事返黎，然後你望穿秋水等左兩個月個好好嘅新同事終於返工，點知返左兩日工就原形畢露，過多兩日仲消失於天地間，任你如何尋人都下落不明。

可以反思嘅係，其實任何一個人去見任何一份工都會話自己好想做呢份工因為好有意義，自己好有熱誠，會完全奉獻，基本上呢個答案就同你話你阿媽係女人一樣冇得輸。職業無分貴賤，其實無論做掃街定還是做高官對社會一樣有貢獻（分分鐘清潔垃圾的工作人員對社會貢獻更大），但對社會貢獻同份工對你黎講有冇意義係完全不相同，意義呢樣嘢並唔係咁樣衡量嘅。如果你覺得呢份工咁有意義，你咁有熱誠，咁你只需問自己一個問題就測試到係咪你真心所想。

假設你覺得咁有意義，咁你願唔願意收象徵式1蚊人工去返工。咁有意義喎？唔收錢都應該做啦下嘛？所以講到尾...... 虛偽的說法。我嘅病人有時客氣跟我道謝，我會同佢地講：「唔洗，應該嘅！」咁唔係客氣回應，係我真心所想，呢個係我本份，因為我有出糧嘅，我只係做我專業應當做嘅事。

不要把自己的職業想像得那麼神聖，present得那麼美好，你是收取等價回報去貢獻你應當貢獻的。真正有意義的，是你不再為生活奔波、為口奔馳，已達財務及時間自由之境時，在沒有任何負擔之下，不問回報去做你想做的事，那才是你真正想過並且對你來說有意義的人生。

2020年波哥第一大挑戰就是工作新挑戰，都係嗰句：鬼叫你窮呀，頂硬上！！！

2020年 - 從感恩開始

2020年了，先祝各位身體健康，投資順利，智慧增長🙏

1990... 2000... 2010... 2020...

一路走來，逢X0結尾的年份帶給我特別深的感受，我以為這是decade效應，但跟身邊人說起發現他們並未有此感受。那另一個原因可能是每逢X0的年份對我來說就是踏入另一個歲數字頭的一年，回首望望，一眨眼就是十年了，這十年我都在忙什麼呢？

這幾個年份除了90年外，其餘年份的倒數時刻在哪裡，跟什麼人一起過都是記得很清楚，仿如昨天。

踏入2020年的第一天，我先做了一件事：我回想了幾十年來，從中學年代開始（因為小學冇咩朋友）的好朋友，大家共過患難的戰友，曾經幫助過我的恩人等一一發what's app去跟他們送上祝福！朋友及戰友當然值得珍惜，但恩人更加要好好感激。對當事人來說，可能只是幫你一個小忙，但實實在在我對每一個恩惠幫忙都銘感於心，雖然未必常有聯絡或很親近，但未有他們的幫忙也就沒有今天的我。除了感激，亦希望抱著相同的心以自己有限的能力去幫助比我們有需要的人：勿以善小而不為。

也特別用一點篇幅多謝一直待在身邊的平妹，1/1也是我們的週年紀念，雖然平淡卻非常快樂。感激這十年你伴我走過高山低谷，無論有什麼都一起去闖，你的支持便是我的原動力。願我們早日能財務及時間自由，好好繼續攜手追尋我們的理想。

一拖手　就過了六百天
剛剛相識一秒
我枕邊　放滿跟你無數合照

熱吻一年恍如五分鐘
熱愛七年還生疏的抱擁
還未夠鐘　還未夠鐘
年月太匆匆

准我仍然守護你
准我能陪你倒數千億個晨曦
我可用十萬年去預備
每天給予你　萬千驚喜
轉眼間白髮回望這生
每一場戲也為你

在那超時空和你相戀
物理不能參詳的計算
誰又看穿　誰又看穿
一生一世有那麼短

熱吻一年恍如五分鐘
熱愛七年來堆積的暗湧
還未看通　還未看通
年月太洶湧

准我仍然守護你
准我能陪你倒數千億個晨曦
我可用十萬年去預備
每天給予你　萬千驚喜
轉眼間白髮回望這生
我風光因你起

准我仍然擁護你
准我能陪你飛看輕我自己
當這世紀都閃過
你於未來亦可找得到我
還像最初　還像最初
一千年與你步過

喜歡你　千年如過一天
光速的戀愛如同飛箭
不敢相信日月如梭
想到最初　怎麼不可時光穿梭

兩鬢斑白情侶不多
一生一世的故事得幾多個
找到我們麼

一百年仍抱緊你
一百年仍愛戀
再不理是非
整過世界都經過
你於平行時空找得到我
還將最初　還像最初
一千年與你步過

一千年太快掠過

眼見為實？

先看看這個video，我看了很多次都還在發笑。

https://www.facebook.com/259827817551891/videos/552927105458476/

有云：耳聽三分假，眼看未為真。

現今資訊發達，隨便開fb或youtube，要看的應有盡有，不過你看到的是否一定是真確，是事實之全部呢？

人都是偏向相信自己想相信的事情，所以現在智慧科技年代，比以往任何一個時代都是更容易被蒙蔽雙眼的年代，那是由於你所得到的資訊主要是由AI分析過你想看哪類型的資訊才灌輸給你，你越看就越覺得只有自己想的信的才是真理，形成一個循環。

不過，這種接收資訊及思考方式容易造成二元對立的局面，對我們看待事情及理性思考造成很大的障礙。

就以投資為例，你是價值投資者，便摒棄所有其他投資操作的方式，覺得每一種方法都不管用，不論momentum，成長股，技術指標，統統都不行，不單止不行，而且還不對，只有自己用的是最好的方法。事實上，世界上真有最好的投資方法嗎？有一套必勝及跑贏大盤的必然方式嗎？我只敢說：找到一個最適合自己的方式並專心鑽研，那投資獲利的機會是相對較高的。

這種思維方式亦對社會造成莫大的衝擊，尤其在政治層面上，每人都採取非黑即白，非對即錯的態度，便會將他人的想法都摒諸門外，這樣自然就不會溝通，形成對立非常的局面。自小畫畫我們已經知道，黑與白兩者調色後會變成灰色，黃加藍會變綠，世界上又豈止只有紅橙黃綠青藍紫？當然每個人可以有自己的看法，尤其大是大非面前，有一個看法是必然的，不過我只想帶出我們除了自己既定的思維外，腦袋及心胸是否有足夠位置容納不同的看法也很重要。

現在我在接收不同資訊及觀看不同影片的時侯，每每會有幾個步驟去思考：

1）這段資訊的來源及真確性能確認嗎？
2）如果確認是真實的，那在片段或圖片的之前會有什麼可能的事發生過？
3）這時可能已經會有個人的看法出現在心中，但我還希望自己能夠站在對方的立場看看他們的角度會怎樣想。

就像金庸先生的辦報的理念：

事實不可歪曲，意見大可自由

年度回顧 - 投資篇

就到年尾，都係時候檢視下自己今年各方面嘅成績。

首先檢討下自己個投資portfolio，我主要有3個投資戶口。

一個係IB戶口，今年3月開通，投資十分分散，包括美股（內含ETF及優先股及Baby bond），港股，新加坡股，英國股，澳洲股，期權，有時見某d外幣抵入都會手痕玩下。

另一個係華盛戶口，主要hold港股及美股，其實呢個戶口早開過IB，但一開通IB後呢個華盛戶口就好似荒廢左咁，因為IB實在真係太太強大，除左世界各地嘅投資標的都幾乎有之外，佢仲可以做期權，又可以做槓桿，而且佣金、滙率都好靚價。雖然佢個界面真係唔多user-friendly，而且報價都好延遲，但另外好嘅嘢一定可以補足到。依家華盛個倉變成了細倉，好少出入，主要都係以前舊貨又冇得做期權嘅先留返喺呢個倉，唔cut嘅原因首先係始終想分散少少資金存放嘅位置，同埋華盛個串流報價的確唔錯。

另一個都係華盛戶口，不過唔係我一個人嘅，係同平妹夾份嘅，只hold港股，都係大概今年3月開通嘅，大家都知今年港股年中開始走勢幾掂架啦，但呢個戶口竟然係咁多個股票戶口收穫最好嘅一個，實在有點幸運。

可以分享下呢個倉有咩搞作。



以上係呢9個月曾經嘅持股，當中有少部份如果你問波哥點解會入，波哥係答你唔到，因為有部份係平妹嘅意思，尤其波哥唔會抽新股，但平妹就鍾意玩即抽即放，咁由於戶口係共同嘅，波哥係會尊重，唯一要求係唔好放長遠。現時仲持有住嘅只剩返越秀房產信託、勝捷企業、置富產業信託、中國通信服務。

總括黎講，呢個戶口係有D運仔，基本上好似得置富一隻係由於反送中運動後蝕緊2%，不過呢隻我係長遠揸黎收息，喺我個人IB戶口都一直持有，所以一D都唔擔心。其餘嘅股票都錄得正回報，其中康哲藥業Total有40-50%回報，所以原本係打算入黎收息嘅都不免心動而分批放走左。



成個portfolio共有16%正回報，對比上圖不同國家嘅股市指數喺3月直至現今嘅表現，呢個成績都算唔錯。不過其餘兩個戶口就冇咁好成績，另一個IB戶口連晒所有股票或ETF升幅連股息加期權金嘅回報率大概只有4%左右，勉強來說就只能追上通脹。

同考試一樣，成績當然係重要，但更重要嘅係要檢視返自己到底有咩做得好，有咩做得唔好，從而改進，希望可以更上一層樓。

經過我反覆思量，我覺得自己距離財務自由尚遠。其中一個重要原因係太細膽，成個倉裡面嘅錢有成60％可能係冇郁過，即係話個倉比如有100萬，持股最高峰嘅時候都只係用左40萬，咁個result就算做得有幾好個實際會因為有太多閒置金錢而影響個整體回報。如何控制每隻股票嘅佔比實在係大學問，當然你可以話其實研究好隻股票，又真係到價位，咪照返你想每隻佔portfolio幾多％去入，但實際操作上其實真係唔係咁容易。因為波哥平常入股票鍾意低位入之餘，仲會通常保守地分3注入，主因係即使自己計過已係低位或合理價，但市場有時真係好不合理繼續下跌時可以分注令成本攤分，但老實講波哥真係甚少情況入到第3注貨，有時第一注已回升，最多都係試過入第2注，咁所以即使睇中一隻股票計晒佔比要用幾錢，但最終筆錢都多數用唔晒，要搵其他投資物再等機會。波哥都會諗諗係咪會再tune下個策略，或者用期權配合睇下可以點樣令回報增加。

第二個大問題就係波哥係buy and hold方面真係要再加強訓練。到底幾時出貨真係一大學問，如果講止蝕，波哥甚少做，因為本身已經研究好，對隻股票有信心，知道點解要買佢，亦都等到好低位先買。但係正所謂「入場係徒弟，出場先係師父」，幾時止賺就真係好難俾到一個definite嘅答案你。到底一隻收息股升左50％值唔值得放，咁要睇佢前景。你原本打算收息5％一年，依家已經升左50％即係收左10年息，咁係咪就應該放呢？你覺得佢係高位已偏離合理價範圍，但會唔會放左之後原來繼續越升越有，而且派息年年遞增呢？咁嘅情況係絕對有可能發生嘅，而最大嘅問題係，你出左呢隻貨之後，閒置嘅錢可否有相同質素嘅投資物喺合理價俾你投資，去俾你創造現金流呢？

來年喺投資嘅路上會更加努力學習，最重要係希望長遠擁有資產創造現金流，而不是只賺取資產升值的部份便急急離場，打好個現金流嘅base為財務自由而努力。共勉之！

祝各位聖誕快樂，願香港平安！

投資工具：樂活五線譜 - 1

今天開始想跟大家分享一個非常極度容易操作的投資工具，並且非常適合散戶操作。

它就是樂活五線譜。

起初接觸這個工具是從一個香港作者的著作中看到，不過那本書只略略介紹了這個工具的簡要用法。但它勾起了我的好奇心，於是上網找資料想知道更多關於這個工具的內容及應用，及後知道這個工具是由幾位有心有熱誠的台灣人以香港曾淵滄教授創立的曾氏通道演變而來。而這個樂活五線譜的應用範圍相當廣泛，不論ETF, 不同國家的股票它都可以搜尋得到。

那時我在台灣找到了關於這個工具的兩本著作，然後立時買了回來細看，仔細研究。這兩本書都是薛兆亨教授及TIVO168合著，他們兩位均是樂活五線譜的始創人之一，還有一位始創者Allan Lin經已仙遊 （雖已離開，但善心的工具永遠流傳於世造福人群）。

其實我最鼓勵大家多看書，只花費$100左右就可以窺探作者的畢生功力（即使他沒有寫盡畢生功力，有3-5成也是相當化算吧？）

如果大家要挑一本來買，我會建議挑白色那本來看，兩本書的內容有點重覆，而且在組織結構方面第二本（活用五線譜，漲跌都能賺）著作都明顯條理分明很多。會不會怕沒有看過第一本，直接跳入第二本會不明白呢？我個人是完全沒有這個感覺。

波哥絕對不是替他們賣廣告，事實上我還訂閱他們的網上週刊以行動支持他們繼續營運這個不收分毛的網站。（我最欣賞就是那些真心分享的人）

今次先簡單介紹一下到底樂活五線譜是什麼，其後的篇幅才深入探討如何操作，在哪種投資標的使用最為理想，有什麼注意事項，也可以取香港某些股票作教學用途。

在介紹前，大家先想想一些問題，你認為恒生指數現在是處於哪個位置呢？高位？合理位置？低位？為何你有這個感覺？是用歷史數據參照？是用對恒指未來趨勢估計從而判斷？

從上圖指數走勢看來，如果你只基於對事實的陳述而不加上自己對恆指的看法時，你大概只能說出恆生指數現處於不低的水平，從2012年至2019年期間，恆指最低的位置曾經在16XXX的水平，而最高曾經到達33XXX的階段。

如果把時間再看長一點，你的觀感會否有改變？似乎恆指是在很高的位置啊！歷史的低位可曾經是2000點啊！如你要以歷史低點來判斷是否值得買入的標準，相信你也很難去找投資標的物了！

那是基於一個概念：就是正常的股市市場縱使經常波動不定，但長遠來說應該也是上揚的。為什麼呢？簡單來說就是這個指數通常反映市值較大且為當地相對穩健的一藍子藍籌公司的價格，縱然價格不一定代表價值，但理性上來說穩健的公司大部份的盈收應該起碼跟得上市場通漲的速度才能長遠營運，所以在假設以價格最終會回歸公司價值的層面看來，穩定經濟體的股市指數長遠應該是會穩步上揚的。

那就產生了一個問題，如不能已歷史高低位去判斷現價高低，那可以怎樣判斷呢？樂活五線譜正正因解決此難題而存在。

先由以下此連結登入樂活五線譜的首頁：

https://invest.wessiorfinance.com/notation.html

拉下去你會見到這樣的畫面，請先在（1）那兒click下去！（「媽的，按什麼鬼廣告呀！」）你心裡一定就這樣咒罵波哥了！哈，別生氣，這樣免費的佛心東西大家不給它一點獎勵，波哥恐防有天它會營運不了下去，別真以為所有免費的東西都是那麼理所當然的啊！

然後，在（2）那邊輸入你想檢查的標的物，例如所有指數類型先要打＾這個符號，所以恒生指數就是^hsi，其他國家或貨幣的代碼之後會有特定篇幅再詳述。

觀察日期它就已經preset了今天的日期，計算期間它也會自動幫你預設了3.5年，這個你當然可以手教調動，按10年也可，按5年也可，不過時期調較得越長，入市的機會也就越少，書中也有解釋為何選擇3.5年作為預設。

跟著就直接按下（3）繪圖，就會出了以下好像彈琴的五線譜圖。

至於（4），就是一些常用的代碼，可以直接按下去那些標的物查看。

好了，那圖出來了，又怎樣看？篇幅有限，怕大家看到睡著了，我們下回再續。

聽貼士/明牌

打開收音機，電視，facebook都充斥住不少大師級嘅人馬，KOL講一d心水號碼，對於大市走勢分析得頭頭是道，有好多聽眾仲會留言，詢問關於現時持有股票或者想入嘅股票嘅走勢去向。

大師們通常睇一睇個電腦，撳兩下圖表就會為你指點迷津，信徒求到明燈後就滿意收貨。

並唔係想在此批評。不過分析走勢唔容易，就算係國家指數嘅ETF都已經受好多外圍因素影響，更何況分析個股。除咗外圍因素，公司嘅財政狀況，仲有大戶可以操控。大家睇一睇下面嘅link就可以知道其實好多出名嘅大師及股評人嘅命中率其實都係喺50至60之間，已經算係好理想了。

https://www.istarpicks.com/app/author/top

我哋俗稱一d攞貼士嘅人，或者聽明牌嘅人，叫做水魚。其實大家有冇諗過，市場上充斥住大多數嘅資訊有可能都係假㗎呢？股評人推薦某d股票俾你，除左持牌人要話你知佢有冇持有該股票，其他嘢佢係唔需要負責任。股票升嘅時候可以攞出嚟自吹自擂；跌嘅時候，佢只需要一本正經咁同你分析為何會由升勢轉為跌勢，止蝕位置如何。其實佢係處於不敗之地，而你先係真金白銀要拎血汗錢出嚟去投資嗰個。

其實講左咁耐，又有邊個會唔聽明牌呢？好啦，我就乾脆承認其實我都睇好多唔同人嘅分析同推薦。呢個係正常不過嘅事。我呢d小嘍囉就睇下唔同勁blogger嘅分析，炒美股嘅人可能會睇下seekingalpha入面嘅一d勁人嘅文章，甚至係分析師其實都會睇更上一層樓嘅專業分析例如bloomberg或者Thomson reuters去探究市場走勢同資訊。

我絕對唔反對吸收唔同嘅資訊，睇唔同人嘅分析。但係，首要條件係你自己要有分析能力，唔係人講就信。做投資，係自己對自己負責，千祈唔好人哋講乜你就去買，買完唔中就鬧人哋係神棍，你估買六合彩咩？你自己放啲錢落去唔係諗清諗楚，你自己負嘅責任係咪應該最大呢？

所以，要投資，先求知。我自己本身睇好多書，屋企嘅投資書籍，喺半年期間已經增加超過50本以上，雖然有好多未睇得晒。其實每次睇唔同嘅投資書，或者佢入面講嘅內容某啲會有相似地方，但係只要你喺每一本書入面拎到一個半個可以令你叮一聲嘅idea，嗰本書已經唔止值百幾蚊。

記住，自己有底子才懂分析人家說得對不對，到時看明牌也沒人能把你當作水魚。