投資工具：樂活五線譜 - 1

今天開始想跟大家分享一個非常極度容易操作的投資工具，並且非常適合散戶操作。

它就是樂活五線譜。

起初接觸這個工具是從一個香港作者的著作中看到，不過那本書只略略介紹了這個工具的簡要用法。但它勾起了我的好奇心，於是上網找資料想知道更多關於這個工具的內容及應用，及後知道這個工具是由幾位有心有熱誠的台灣人以香港曾淵滄教授創立的曾氏通道演變而來。而這個樂活五線譜的應用範圍相當廣泛，不論ETF, 不同國家的股票它都可以搜尋得到。

那時我在台灣找到了關於這個工具的兩本著作，然後立時買了回來細看，仔細研究。這兩本書都是薛兆亨教授及TIVO168合著，他們兩位均是樂活五線譜的始創人之一，還有一位始創者Allan Lin經已仙遊 （雖已離開，但善心的工具永遠流傳於世造福人群）。

其實我最鼓勵大家多看書，只花費$100左右就可以窺探作者的畢生功力（即使他沒有寫盡畢生功力，有3-5成也是相當化算吧？）

如果大家要挑一本來買，我會建議挑白色那本來看，兩本書的內容有點重覆，而且在組織結構方面第二本（活用五線譜，漲跌都能賺）著作都明顯條理分明很多。會不會怕沒有看過第一本，直接跳入第二本會不明白呢？我個人是完全沒有這個感覺。

波哥絕對不是替他們賣廣告，事實上我還訂閱他們的網上週刊以行動支持他們繼續營運這個不收分毛的網站。（我最欣賞就是那些真心分享的人）

今次先簡單介紹一下到底樂活五線譜是什麼，其後的篇幅才深入探討如何操作，在哪種投資標的使用最為理想，有什麼注意事項，也可以取香港某些股票作教學用途。

在介紹前，大家先想想一些問題，你認為恒生指數現在是處於哪個位置呢？高位？合理位置？低位？為何你有這個感覺？是用歷史數據參照？是用對恒指未來趨勢估計從而判斷？

從上圖指數走勢看來，如果你只基於對事實的陳述而不加上自己對恆指的看法時，你大概只能說出恆生指數現處於不低的水平，從2012年至2019年期間，恆指最低的位置曾經在16XXX的水平，而最高曾經到達33XXX的階段。

如果把時間再看長一點，你的觀感會否有改變？似乎恆指是在很高的位置啊！歷史的低位可曾經是2000點啊！如你要以歷史低點來判斷是否值得買入的標準，相信你也很難去找投資標的物了！

那是基於一個概念：就是正常的股市市場縱使經常波動不定，但長遠來說應該也是上揚的。為什麼呢？簡單來說就是這個指數通常反映市值較大且為當地相對穩健的一藍子藍籌公司的價格，縱然價格不一定代表價值，但理性上來說穩健的公司大部份的盈收應該起碼跟得上市場通漲的速度才能長遠營運，所以在假設以價格最終會回歸公司價值的層面看來，穩定經濟體的股市指數長遠應該是會穩步上揚的。

那就產生了一個問題，如不能已歷史高低位去判斷現價高低，那可以怎樣判斷呢？樂活五線譜正正因解決此難題而存在。

先由以下此連結登入樂活五線譜的首頁：

https://invest.wessiorfinance.com/notation.html

拉下去你會見到這樣的畫面，請先在（1）那兒click下去！（「媽的，按什麼鬼廣告呀！」）你心裡一定就這樣咒罵波哥了！哈，別生氣，這樣免費的佛心東西大家不給它一點獎勵，波哥恐防有天它會營運不了下去，別真以為所有免費的東西都是那麼理所當然的啊！

然後，在（2）那邊輸入你想檢查的標的物，例如所有指數類型先要打＾這個符號，所以恒生指數就是^hsi，其他國家或貨幣的代碼之後會有特定篇幅再詳述。

觀察日期它就已經preset了今天的日期，計算期間它也會自動幫你預設了3.5年，這個你當然可以手教調動，按10年也可，按5年也可，不過時期調較得越長，入市的機會也就越少，書中也有解釋為何選擇3.5年作為預設。

跟著就直接按下（3）繪圖，就會出了以下好像彈琴的五線譜圖。

至於（4），就是一些常用的代碼，可以直接按下去那些標的物查看。

好了，那圖出來了，又怎樣看？篇幅有限，怕大家看到睡著了，我們下回再續。

聽貼士/明牌

打開收音機，電視，facebook都充斥住不少大師級嘅人馬，KOL講一d心水號碼，對於大市走勢分析得頭頭是道，有好多聽眾仲會留言，詢問關於現時持有股票或者想入嘅股票嘅走勢去向。

大師們通常睇一睇個電腦，撳兩下圖表就會為你指點迷津，信徒求到明燈後就滿意收貨。

並唔係想在此批評。不過分析走勢唔容易，就算係國家指數嘅ETF都已經受好多外圍因素影響，更何況分析個股。除咗外圍因素，公司嘅財政狀況，仲有大戶可以操控。大家睇一睇下面嘅link就可以知道其實好多出名嘅大師及股評人嘅命中率其實都係喺50至60之間，已經算係好理想了。

https://www.istarpicks.com/app/author/top

我哋俗稱一d攞貼士嘅人，或者聽明牌嘅人，叫做水魚。其實大家有冇諗過，市場上充斥住大多數嘅資訊有可能都係假㗎呢？股評人推薦某d股票俾你，除左持牌人要話你知佢有冇持有該股票，其他嘢佢係唔需要負責任。股票升嘅時候可以攞出嚟自吹自擂；跌嘅時候，佢只需要一本正經咁同你分析為何會由升勢轉為跌勢，止蝕位置如何。其實佢係處於不敗之地，而你先係真金白銀要拎血汗錢出嚟去投資嗰個。

其實講左咁耐，又有邊個會唔聽明牌呢？好啦，我就乾脆承認其實我都睇好多唔同人嘅分析同推薦。呢個係正常不過嘅事。我呢d小嘍囉就睇下唔同勁blogger嘅分析，炒美股嘅人可能會睇下seekingalpha入面嘅一d勁人嘅文章，甚至係分析師其實都會睇更上一層樓嘅專業分析例如bloomberg或者Thomson reuters去探究市場走勢同資訊。

我絕對唔反對吸收唔同嘅資訊，睇唔同人嘅分析。但係，首要條件係你自己要有分析能力，唔係人講就信。做投資，係自己對自己負責，千祈唔好人哋講乜你就去買，買完唔中就鬧人哋係神棍，你估買六合彩咩？你自己放啲錢落去唔係諗清諗楚，你自己負嘅責任係咪應該最大呢？

所以，要投資，先求知。我自己本身睇好多書，屋企嘅投資書籍，喺半年期間已經增加超過50本以上，雖然有好多未睇得晒。其實每次睇唔同嘅投資書，或者佢入面講嘅內容某啲會有相似地方，但係只要你喺每一本書入面拎到一個半個可以令你叮一聲嘅idea，嗰本書已經唔止值百幾蚊。

記住，自己有底子才懂分析人家說得對不對，到時看明牌也沒人能把你當作水魚。

與上市公司對話講座 - 中國鐵塔

昨天參加左呢個講座。

自己本身都係中國鐵塔小股東，雖然佢唔係收息股，但有時作為好息之徒嘅波哥睇中某d行業前景, 冇息收黎做現金流嘅股票一樣會照買，搏呢d成長股一登龍門，升價十倍，中國鐵塔係其中一個例子。主要因為公司喺行業中嘅壟斷性同埋5G已成為中美對疊嘅戰略必爭之地。聽完上市公司親身黎同小股東講解公司發展，我對佢更加有信心。而呢隻股票雖然冇乜息收，不過有期權可做，期權最少做10000股，所以可以運用期權特性喺適當時候賺下期權金。長遠黎講，如果公司發展良好，出租情況理想，最終嘅盈利都係會回饋俾股東。

當然大家係可以考慮其他5G相關股嘅，甚至其他國家嘅相關股票，例如美股嘅AMT同 CCI，不過兩隻都已經爆升，喺相對高位；另外如果對產業前景發展看好，但又唔想或唔識點樣分析到底個股是否值得投資，亦可考慮買相關ETF。

想了解到底5G及通訊塔是什麼同埋特性及將來發展，其實已經好多website或者blogger有好詳盡嘅解釋，以下係其中兩篇：

https://blog.usstocks.com.tw/?p=3882

https://icemilkinvestment.blogspot.com/2019/07/5g42.html?m=1

至於除左5G產業外，仲有幾個產業波哥都覺得好有發展空間，會誠意推薦俾大家，包括：醫療產業，電子支付，網絡安全。

邏輯思考

作為醫護團隊的一份子，聽到一局之長竟然說出如此荒唐之話，真感到羞愧。

「關於催淚彈有什麼成份，我們掌握資料有限。

我們不宜公開催淚彈成份，否則會影響警方部署。

關於催淚彈的成分，我們保證是絕對安全的。」

只要一個稍微有理解能力的人都想不通這是一個什麼樣的邏輯學。

同一邏輯可以應用在投資上：

「關於公司的盈虧，我們掌握的資料有限。

我們不宜公開公司的財務報告，否則會影響管理層的部署。

不過我們可以保證你投資進來的錢是會必賺的。」

如果陳局長膽敢把全副身家押在以上的公司，我便相信警方使用的催淚彈是絕對安全的。

如果每天只有12小時......

有一天，一個中年病人來覆診，病情嚴重了，用藥的份量需要由每天三次改為每天四次。於是我向他解釋：「以往是每天吃三次，現在改了每天吃四次，大概6小時一次。」

他很驚訝的望著我：「我之前是4小時吃一次，怎麼現在吃多了反而變成6小時才一次？」

我說：「怎麼每天三次會是4小時一次？應該8小時一次才對呀！」

他答：「怎麼可能啊？一天只有12小時，8小時一次怎麼可以吃三次啊？」

我努力維持我的表情及語調，道：「其實一天是有24小時而不是12小時。」

遊戲啟示篇

以下遊戲幾得意。

給你usd2000本金，從2009年開始投資10年美股牛市。每兩年只投資落一隻股票度，賺到嘅加本金用黎再reinvest。時光倒流，俾你未卜先知知道埋到底嗰段時間有咩大事發生，你會如何選擇，最終可以從$2000增加到幾多資金？

https://act.webull.com/flashback10Years/?cs=a&s=boonlee

遊戲啟示：
1）10年增長2188倍（還不是最好的成績），呢個係一個咩概念呢？即係每年平均增長200倍左右，亦即係每年平均回報率為20000％

2）要做到呢個神蹟，你首先要揀啱左美國呢個市場，然後每年你好有觸角咁揀啱到板塊，再繼而你好似神一樣一扑就中升200-700％嘅股票

3）仲有一個好重要嘅原因可以做到呢個return，就係你需要做到好叻嘅buy and hold，不論d股票升到幾高位，你都唔覺得佢會回落，亦唔想賺100％左右就收成

4）跟住你仲要頭兩年買左LULU賺左700％後竟然唔做資產分配，繼續全數推落股票市場去扑某一隻股票

遊戲而已，何必認真，不過就算我們不是神，就算我們對個股分析沒那麼神準，也不表示我們沒機會做到資本增值，最起碼如果10年前你肯投資etf VTI，食正美股10年升浪，也是不錯的回報吧？總好過只把錢放在銀行或做定期吧？

盡早學習投資，時間就是力量！共勉之！

伸手黨

同朋友講開投資，好多時都會聽到一個問題：近排有咩股票/心水推介。

我自己唔介意share自己揸住啲乜嘢，但好老實講，我自己都會好有保留咁講俾d冇研究開投資嘅人聽，絕對唔會對佢地大力唱好某d股票/投資標的。原因唔係因為我自私，反而係因為我係一個負責任嘅人。我知道好多人嘅心態：冇時間做功課，冇做分析，對公司業績及財務狀況一無所知，唔好話年報，連上yahoo finance睇一睇間公司基本資料佢地都懶，或者唔知點入手研究。佢地主要就係想有個人研究好，餵埋食，佢地只想知道3樣嘢：1）股票號碼，2）入市位，3）止賺位。佢地甚至連止蝕位都唔會問你，彷彿今日買，希望明天升，如果跌的話，佢會問點解，但是原因不重要，因為無論如何佢會選擇揸住先，一日未放出都唔叫蝕。

俾料人其實唔係問題，雖然我花左咁多時間研究，但如有知音分享交流咁絕不是問題。對我自己嚟講，share自己揸住啲乜貨，其實真係純粹sharing，但係好多人就會覺得呢啲係貼士。咁樣對share嘅人嚟講其實會變成一種壓力。我自己分析過，對某公司熟悉，有信心投資落去做股東，咁我買嘅股票，即使價跌，即使坐貨，我都坐得悠然自得。但係我share咗出嚟，人地有理冇理跟我買左，然後問我點解會蝕錢，對於我嚟講就變成一種壓力。所以我成日都好佩服一啲認真嘅blogger無私奉獻share自己嘅倉出黎，因為呢個世界太多人，又唔做嘢，又唔讀書，問人攞完料，中左多謝都冇聲，仲覺得自己料事如神，唔中就覺得人哋係神棍。

而對於攞料嘅人嚟講，share股票號碼/投資標的俾佢落盤，對佢嚟講都未必係好事。首先佢投資左唔熟悉嘅投資標的而呢隻產品向下行時，佢夠唔夠膽揸住？佢會唔會承受唔住壓力走貨？佢會唔會擔心到晚晚都瞓唔著覺，怨天尤人？就當我一講完出嚟隻股票就即刻升，佢清唔清楚 到底應該繼續揸住定應該趁高位走貨？之後嘅策略又應該係點？

另外，佢又敢擺幾多資金落去一隻佢唔熟悉嘅投資標的度？如果只要有人俾貼士就會擺曬成副身家落去，咁嗰個人是傻的。如果佢買一半身家落去，佢都需要承受好大嘅投資壓力。如果佢只係小試牛刀，放少少資金落去玩下，不癢不痛，咁唔係投資而只係賭博，因為佢冇一個好好嘅portfolio去run佢嘅資金而令到資金有穩定嘅增長。咁倒不如拎嗰d不癢不痛嘅錢去澳門押一把大細黎得過癮。